औरंगाबाद : वाळूज परिसरातील खवड्या डोंगर परिसरात निर्जनस्थळी नेऊन एका 15 वर्षीय अल्पवयीन मुलीवर बलात्कार केल्याची धक्कादायक घटना समोर आली आहे. आरोपीने आपल्या मैत्रिणीला गप्पा मारण्याच्या बहाण्याने खवड्या डोंगर परिसरात दुचाकीवरून घेऊन गेला आणि बळजबरीने बलात्कार केला. याप्रकरणी वाळूज एमआयडीसी पोलिसांनी आरोपीवर बलात्कार, अपहरण आणि पोक्सोअंतर्गत गुन्हा दाखल केला आहे.
संबंधित अटक केलेल्या आरोपीचे नाव सोमेश भिकुलाल मुंगसे (वय 22, रा. तिसगाव) आहे. आरोपीने पीडित मुलीसोबत काही दिवसांपूर्वी मैत्री केली होती.
विश्वास संपादन केल्यानंतर 4 जून रोजी आरोपी पीडितेला गप्पा मारण्याचा बहाणा करत दुचाकीवरून खवड्या डोंगराच्या पायथ्याशी घेऊन गेला. याठिकाणी आरोपीने संधीचा फायदा उचलत पीडितेच्या इच्छेविरुद्ध तिच्यावर बलात्कार केला. दरम्यान, मुलगी अचानक बेपत्ता झाल्यामुळे पालकांनी वाळूज एमआयडीसी पोलिस ठाण्यात अपहरण झाल्याचा गुन्हा नोंदवला.
दुसरीकडे, आरोपीने बलात्कार केल्यानंतर पीडित मुलीला स्वतःच्या घरी घेऊन गेला. पीडित मुलीचे आई वडील बाहेरगावी गेले आहेत. त्यामुळे तिला आजची रात्र आपल्या घरात राहु द्यावे, अशी विनंती आरोपीने आपल्या आई वडिलांना केली होती. त्यामुळे आरोपीच्या पालकांनीही पीडितेला आपल्या घरात एका रात्रीसाठी आसरा दिला. दुसऱ्या दिवशी आरोपीने पीडितेला सिडको येथील एका उद्यानासमोर सोडून फरार झाला. भेदरलेल्या अवस्थेत असणाऱ्या पीडित मुलीची माहिती स्थानिक नागरिकांनी वाळूज एमआयडीसी पोलिसांना दिली.
दरम्यान, पोलिसांनी पीडितेला ताब्यात घेतले आणि मुलीच्या पालकांना याबाबतची माहिती दिली. पीडितेची मानसिकता लक्षात घेऊन पालकांनी मुलीची विचारपूस केली. यावेळी तिने तिच्यासोबत घडलेला सर्व प्रकार आपल्या आई वडिलांना सांगितला. यानंतर वाळूज एमआयडीसी पोलिसांनी 6 जून रोजी रात्री उशीरा आरोपी तरुणाला औद्योगिक परिसरातून अटक केली. 7 जून रोजी आरोपीला न्यायालयात हजर केले असता न्यायालयाने आरोपीला 10 जूनपर्यंत पोलिस कोठडी सुनावली आहे.
प्रतिनिधि
दिलीप सोनकांबळे
