शबनम न्यूज | पुणे
पुण्यात कामावरून काढून टाकल्याच्या कारणावरून एका तरुणाने बोपोडीतील नदीपात्रात उडी मारून आत्महत्या केल्याचा प्रकार समोर आला आहे. याप्रकरणी तरुणाला आत्महत्येस प्रवृत्त केल्याच्या कारणावरून खाजगी कंपनीतील एका व्यवस्थापकाविरुद्ध गुन्हा दाखल करण्यात आला आहे.
विशाल प्रमोद साळवी असे आत्महत्या केलेल्या तरुणाचे नाव आहे. विशाल याला आत्महत्येस प्रवृत्त केल्याच्या आरोपावरून खाजगी कंपनीचे व्यवस्थापक झीशान हैदर याच्या विरुद्ध गुन्हा दाखल करण्यात आला आहे. याबाबत विशालची बहीण प्रीती अमित कांबळे (वय ४२,रा. पिंपळे गुरव) यांनी खडकी पोलीस ठाण्यात फिर्याद दिली.
फिर्यादीनुसार, विशाल येरवड्यातील कॉमरझोन आयटी पार्कमधील एका खाजगी कंपनीत कामाला होता. कंपनीतील व्यवस्थापक झीशान हैदर याने विशालला कंपनीतील कामगारांसमोर अपमानित केले. कामावरून काढून टाकण्याची धमकी दिली. विशालला कामावरून कमी करण्यात आल्याने विशाल नैराश्यात होता. २१ जून रोजी त्यांनी बोपोडीतील नदीपात्रात उडी मारून आत्महत्या केली. आत्महत्या करण्यापूर्वी विशालने सोशल मीडियावर चिट्ठी आणि झीशान हैदर चा फोटो टाकला होता. कामावरून काढून टाकणे तसेच कंपनी व्यवस्थापकाच्या त्रासामुळे आत्महत्या करत असलेले चिठ्ठीत नमूद करण्यात आले होते. असे विशालची बहीण प्रीती यांनी दिलेल्या फिर्यादीत म्हटले आहे. याबाबत अधिक तपास पोलीस करीत आहेत.
