शबनम न्यूज | चिंचवड
शहरातील चिंचवड मधील एका डॉक्टराला सीबीआय अधिकारी बोलत असल्याचे भासवत त्याची 28 लाखांची फसवणूक केल्याचा धक्कादायक प्रकार समोर आला आहे. डॉक्टरांच्या क्रेडिट कार्ड वरून संशयित व्यवहार झाले असून त्याबाबत कारवाई न करण्यासाठी डॉक्टरकडून 28 लाख 35 हजार रुपये घेत फसवणूक करण्यात आली. ही घटना 28 नोव्हेंबर रोजी मोहन नगर ,चिंचवड येथे घडली.
डॉ.भारत कांतीलाल शहा (वय,76 , रा.चिंचवड) यांनी पिंपरी पोलीस ठाण्यात फिर्याद दिली. त्यानुसार रवी कुमार आणि एक अनोळखी व्यक्ती यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, रवी कुमार नाव सांगणाऱ्या व्यक्तीने डॉ.शहा यांना फोन केला. फोनवरून व्यक्तीने तो सीबीआय अधिकारी आहे, असे सांगितले. डॉक्टर शहा यांच्या क्रेडिट कार्डवरून एक कोटीची व्यवहार झालेले आहे, त्याबाबत त्यांना सर्वोच्च न्यायालयाची आणि ईडीची खोटी नोटीस मोबाईलवर पाठवली. या प्रकरणांमध्ये डॉ. शहा यांना अटक होण्यापासून वाचायचे असेल तर 20लाख रुपये भरावे लागतील, असे सांगितले. त्यानंतर इतर कारणे सांगून शहा यांच्याकडून एकूण 28 लाख 35 हजार रुपये घेत त्यांची फसवणूक केली. याबाबत अधिक तपास चिंचवड पोलीस करीत आहेत.
