शबनम न्यूज पिंपरी चिंचवड प्रतिनिधी :
राज्य शासनाच्या चिंचवड मतदारसंघातील थेरगाव येथे शुक्रवार दि.१६/६/२०२३ रोजी आयोजित करण्यात आलेल्या शासन आपल्या दारी या कार्यक्रमात पिंपरी चिंचवड शहर या उद्योग नगरीतील स्वर्गीय यशवंतराव चव्हाण स्मारकाला पाच कोटी रुपये अनुदान देण्याची आग्रही मागणी चिंचवड विधानसभा मतदारसंघाच्या आमदार अश्विनीताई जगताप यांनी मुख्यमंत्री एकनाथ शिंदे यांच्याकडे केली असता मुख्यमंत्री एकनाथजी शिंदे यांनी कार्यक्रम प्रसंगी केलेल्या भाषणात स्वर्गीय यशवंतराव चव्हाण यांच्या स्मृती व कार्याची माहिती भावी पिढीला व्हावी या हेतूने पिंपरी चिंचवड शहरातील निगडी प्राधिकरण येथे स्वर्गीय यशवंतराव चव्हाण स्मारक समितीच्या वतीने उभारण्यात येणाऱ्या स्मारकाला पाच कोटी रुपये अनुदान देण्याचे तात्काळ जाहीर केले.
स्वर्गीय यशवंतराव चव्हाण स्मारकाला पाच कोटी रुपये अनुदान देण्याबाबतची मागणी आमदार अश्विनीताई जगताप यांनी आपल्या भाषणातून केली त्यांनी यावेळी आपल्या भाषणातून नमूद केले की स्वर्गीय यशवंतराव चव्हाण यांनी महाराष्ट्रभर राबविलेल्या औद्योगिक आणि सहकार धोरणामुळे पिंपरी चिंचवड मुंबई पुणे सह संपूर्ण महाराष्ट्रभर उद्योगधंदे सुरू होऊन अल्पावधीतच महाराष्ट्र राज्य आंतरराष्ट्रीय पातळीवर औद्योगिक राज्य म्हणून नावरूपास आले. कुशल हातांना रोजगार मिळाला छोट्या-मोठ्या उद्योग धंद्यांना चालना मिळाली याच कार्याची स्फूर्ती भावी पिढीतील युवकांना मिळावी म्हणून यशवंतराव चव्हाण स्मारक समितीमार्फत उद्योग नगरीतील निगडी प्राधिकरणातील 44 गुंठ्यावर स्वर्गीय यशवंतराव चव्हाण यांचे अद्यावत स्मारक करण्याचा संकल्प हाती घेण्यात आला आहे त्या अनुषंगाने स्वर्गीय यशवंतरावजी चव्हाण यांचा पूर्णकृती पुतळा, गोरगरीब मुलांसाठी वसतिगृह, विद्यार्थी मार्गदर्शन केंद्र,वधु वर सुचक केंद्र,नोकरी विषयक मार्गदर्शन केंद्र, सुसज्ज ग्रंथालय इत्यादी सुविधांसह आराखडा मंजूर करून चार मजल्यापर्यंतचे इमारतीचे बांधकाम पूर्ण करण्यात आले असून संपूर्ण इमारत बांधण्याचा खर्च अंदाजे रुपये 15 कोटी आहे सदर स्मारका करता पिंपरी चिंचवड महानगरपालिकेच्या वतीने पाच कोटी रुपयांचे अनुदान मंजूर करण्यात आले होते परंतु सदर स्मारकाचे काम पूर्ण न होऊ शकल्याने राज्याचे माननीय मुख्यमंत्री श्री एकनाथरावजी शिंदे यांच्याकडे सदर स्मारकाला पिंपरी चिंचवड महानगरपालिकेच्या निधीतून पाच कोटी रुपये अनुदान देण्याची आग्रही मागणी केली असता राज्याचे *मुख्यमंत्री एकनाथरावजी शिंदे* यांनी आपल्या भाषणात स्वर्गीय यशवंतराव चव्हाण यांच्या स्मृती व कार्याची माहिती भावी पिढीला व्हावी या शुद्ध हेतूने पिंपरी चिंचवड शहरातील निगडी प्राधिकरण येथे स्वर्गीय यशवंतराव चव्हाण स्मारक समितीच्या वतीने उभारण्यात येणाऱ्या स्मारकाला पाच कोटी रुपये अनुदान देण्याचे तात्काळ जाहीर करून समितीच्या कार्याचे कौतुक केले.