शबनम न्युज | पिंपरी चिंचवड
पिंपरी चिंचवड शहरातील रावेत परिसरात ओम प्रतिष्ठान संस्थेच्या वतीने सर्व वयोगटातील मुलांसाठी पारंपारिक खेळाचे मोफत आयोजन करण्यात आले आहे. यामध्ये विट्टी-दांडू, गोटया, भोवरा, चिपळ्या , सागरगोटे, चल्लस-आठ, रुमाल उडवी, कांदा-फोडी, कोया, चाकाची चक्री, लिंगोर्चा, आप्पा-रप्पी, गिलोरी, आट्या-पाट्या इत्यादी खेळ शिकविले जाणार आहेत.
पूर्वी शाळेला सुट्टी लागल्यानंतर गल्ली – बोळात लपा-छपी, गोटया, चिपळ्या, सागरगोटे इत्यादी खेळासोबत बालचमुंचा किलबिलाट असायचा. परंतु हल्ली इंटरनेटच्या या काळात हे खेळ लुप्त होण्याच्या मार्गावर आहेत. सोसायटीच्या या महानगरीत, मैदाना अभावी मुले घरातच टीव्ही पाहणे व मोबाइलवर गेम खेळण्यातच गुरफटून चालली आहेत. परिणामी लहान वयातच शारीरिक व मानसिक आजाराने कमकुवत होत चालली आहेत. याला कारण म्हणजे कोणता खेळ खेळायचा असा मोठा प्रश्न त्यांच्या समोर आहे. बऱ्याच जणांना तर हे देशी खेळ माहीतच नाहीत. या पार्श्वभूमीवर ओम प्रतिष्ठान संस्थेने सर्व वयोगटातील मुलांसाठी या पारंपारिक खेळाचे मोफत आयोजन केले आहे.
सदर कार्यक्रम विद्यांगण हायस्कूल, लक्ष्मी नगर, भालचंद्र विहार जवळ रावेत येथे ६ मे रोजी सकाळी १० ते सायंकाळी ५ ते ७ दरम्यान संपन्न होणार आहे. तसेच कार्यक्रमापूर्वी नोंदणी आवश्यक असल्याचेही आयोजकांवतीने सांगण्यात आले आहे.
या खेळांमुळे मुले सुदृढ तर बनतीलच, परंतु त्या सोबतच मुलांचे संवाद कौशल्य, निर्णय क्षमता, निर्भीडपणा, चपळता, सांघिक वृत्ती, अचूक अंदाज बांधणी इत्यादी गुण वाढीस लागतात. परिणामी मुलांचे शारीरिक व मानसिक संतुलन विकसित होण्यास मदत होते. पारंपरिक खेळाच्या माध्यमातून निखळ आनंद व मनोरंजनातून व्यक्तिमत्व विकास घडविण्यासाठी, सर्व पालकांनी आपल्या पाल्याचा सहभाग अवश्य नोंदवावा, असे आवाहन संस्थेच्या अध्यक्षा वनिता सावंत यांनी केले आहे.