पुणे, प्रतिनिधी: सिंहगड-राजगड-तोरणा-लिंगाणा (SRTL) अल्ट्रा ट्रेल मॅरेथॉन हेमंत लिंबू याने १०० किलोमिटर अंतर असलेली ११ तास ४१ मिनिटात पुर्ण केली; तर महिलांमध्ये चंद्रभागा कचरे यांनी हे अंतर १९ तास ३७ मिनिटात पूर्ण केले. वेस्टर्न घाट्स रनिंग फाउंडेशन आयोजित SRTL अल्ट्रा ट्रेल मॅरेथॉन २०२३ या महाराष्ट्रातील पहिल्या आणि भारतातील सर्वोत्तम मानल्या जाणाऱ्या स्पर्धेचे हे सहावे पर्व होते. ४ विविध अंतर श्रेणींमध्ये ७ देशातून आणि २४ राज्यातील तब्बल १००० रनर्सचा सहभाग असलेली एसआरटीएल 100K ही आंतरराष्ट्रीय ट्रेल रनिंग मॅरेथॉन काल सह्याद्रीच्या डोंगररांगेत यशस्वी पार पडली.
हेमंतने एसआरटी स्पर्धेच्या मागील पाच वर्षांचे सर्व विक्रम यावेळी मोडीत काढले. हा ट्रेल रनिंग मधला राष्ट्रीय विक्रम असल्याचा दावा एसआरटीच्या आयोजकांनी केला आहे. पश्चिम बंगालच्या रिंबिक गावातील हेमंत लिंबू हा २६ वर्षाच्या युवक आहे. त्याने ११ तास ४१ मिनिटात १०० किलोमीटरचे अंतर आणि ३८०० मीटरची चढाई करत भारतातील अल्ट्रा धावपट्टुंमध्ये सर्वोच्च स्थान मिळवले आहे.
एसआरटीएल अल्ट्रा मॅरेथॉन स्पर्धेचे आयोजन अध्यक्ष दिग्विजय जेधे, विश्वस्त अनिल पवार, महेश मालुसरे, मंदार मते, मारूती गोळे, अमर धुमाळ, ऍड. राजेश सातपुते, हर्षद राव व टीम डब्ल्युजीआरएफ च्या ५०० स्वयंसेवकांनी यासाठी अथक परिश्रम केले. स्पर्धेचे उद्घाटन माजी सहाय्यक पोलीस आयुक्त श्री भानुप्रताप बर्गे यांनी केले.
जागतिक वारसा असलेल्या पश्चिम घाटातील सह्याद्रीच्या डोंगर रांगेत श्री छत्रपती शिवाजी महाराजांच्या पराक्रमाची साक्ष देत शेकडो वर्ष ताठ मानेने उभ्या असलेल्या “सिंहगड राजगड तोरणा लिंगाणा” या किल्यांवरून धावण्याची महाराष्ट्रातील पहिली आंतरराष्ट्रीय स्पर्धा आणि भारतातील सर्वोत्तम स्पर्धा म्हणजे एसआरटीएल अल्ट्रा ट्रेल मॅरेथॉन आहे. या स्पर्धेत तब्बल ६३ रनर्सने १०० किलोमीटरचे अंतर वेळेत पूर्ण केल्यामुळे केवळ ही स्पर्धा महाराष्ट्राच्याच नव्हे तर भारताच्या ट्रेल रनिंग विश्वाच्या शिरपेचात मानाचा तुरा ठरली आहे.
स्पर्धेत गोळेवाडी (डोणजे) ते सिंहगड ११ किमी, डोणजे-सिंहगड ते राजगड २५ किमी, डोणजे-तोरणा ५३ किमी आणि डोणजे ते लिंगाणा १०० किमी अशा चार अंतर श्रेणीमध्ये ही स्पर्धा आहे. वेस्टर्न घाट रनिंग फाउंडेशन हे इंटरनॅशनल ट्रेल रनिंग असोसियेशनची (इट्रा) सदस्य आहे. एसआरटीएल ही स्पर्धा वेळेत पुर्ण करणारया स्पर्धकांना फ्रांस मधील UTMB पात्रतेसाठी अवश्यक गूण मिळतात. सिंहगडाच्या पायथा गोळेवाडी येथे पहाटे सहा वाजता छत्रपती शिवाजी महाराजांच्या जयघोषात सुरू झाली. वेल्ह्यातील तोरणा विद्यालयात सांगता झाली. पर्यावरण रक्षण व गडकोट संवर्धनाचा संदेश देणारी स्पर्धा छत्रपती शिवाजी महाराजांना समर्पित केली आहे.
एसआरटीएल स्पर्धेच्या पाच वर्षांच्या यशस्वी परंपरेला साजेल अशीच या वर्षीची एसआरटीएल 100K ही स्पर्धा वेस्टर्न घाट्स रनिंग फाउंडेशनने यशस्वी केली. श्री छत्रपती शिवाजी महाराज आणि सह्याद्रीतील गडकोटांच्या गौरवशाली ऐतिहासिक सुवर्णक्षणांची आठवण करून देणाऱ्या आणि अतिशय चित्तथरारक व रोमांचकारी असलेल्या एसआरटीएल स्पर्धेसाठी जगभरातून आलेल्या १००० रनर्सच्या स्वागताची आणि सुरक्षिततेची जय्यत तयारी फाउंडेशनच्या सुमारे ५०० स्वयंसेवकांनी केली होती.
महाराष्ट्र राज्य पर्यटन विभाग, राज्य पूरातत्त्व विभाग, पुणे वन विभाग, महाराष्ट्र पोलिस दल, महाराष्ट्र शासन यांच्या विशेष परवानगीने मान्यता मिळाली. तसेच पुणे जिल्हा शिक्षण मंडळ, बिव्हीजी ग्रूप, सिंहगड ग्रूप ऑफ इंस्टिट्युट्स, व या मार्गावरील ग्रामपंचायतींचे व ग्रामस्थांचे विशेष सहकार्य लाभले.
——————————
SRTL ULTRA 2023 Results
• सिंहगड-राजगड-तोरणा-लिंगाणा – एसआरटीएल १०० कि.मी. अंतर व ३८७० मी. चढाईमध्ये
पुरूष विजेता –
क्र. १ – हेमंत लिंबू – ११:४१:२१
क्र. २ – सोम बहादूर थामी – ११:५७:००
क्र. ३ – देव चौधरी – १४:१४:५७
महिला विजेता –
क्र. १ – चंद्रभागा संतोश कचरे – १९:३७:३५
क्र. २ – यामिनी कोठारी – २०:०५:५१
क्र. ३. – तृप्ती काटकर चव्हाण – २०:०९:५६
• सिंहगड-राजगड-तोरणा – ५३ कि. मी. व २३२० मीटर चढाईमध्ये
पुरूष विजेता –
क्र. १ – विशाल राजभर – ६:५७:५५
क्र. २ – राकेश पाटील – ७:४३:००
क्र. ३ – सूरज यादव – ८:१६:४४
महिला विजेता –
क्र. १ – शिल्पा फडके – १०:१५:५४
क्र. २ – स्नेहल गोडांबे – १०:३२:३४
क्र. ३. – सुविधा कडलग – १०:३८:१८
• सिंहगड-राजगड – २५ कि. मी. व ११०० मीटर चढाईमध्ये
पुरूष विजेता –
क्र. १ – इनेश वासवा – २:१९:५३
क्र. २ – कैलास कोकरे – २:३९:२९
क्र. ३ – सार्थ साबळे – २:५८:०३
महिला विजेता –
क्र. १ – हेमा आवळे – ३:५७:२४
क्र. २ – दिपाली देवराये – ४:०४:०९
क्र. ३. – पल्लवी हडावले – ४:१४:४६
• सिंहगड हाफ व्हर्टीकल कि.मी. – ११ कि. मी. व ७०० मीटर चढाईमध्ये
पुरूष विजेता –
क्र. १ – भागवत धुमाळ – १:२६:२८
क्र. २ – तनय कचरे – १:२९:०३
क्र. ३ – सिद्धार्थ लोखंडे – १:३६:४६
महिला विजेता –
क्र. १ – वीणा तडसरे – १:५०:१८
क्र. २ – कविता मोरे – १:५६:२०
क्र. ३. – अनुष्का धोका – २:१०:०२